Долоо хоног бүр удирдах ажилтны шуурхай хуралдаанд аймгийн Засаг даргын дэргэдэх агентлагууд чиг үүргийн хүрээнд цаг үеийн нөхцөл байдалтай холбогдуулан мэдээлэл танилцуулдаг.

 Өнөөдөр аймгийн ЗДТГ-ын Санхүү,төрийн сангийн хэлтсээс “Дорнод аймгийн 2025 оны төсвийн нөхцөл байдал, 2026 оны төсвийн төлөвлөлтийн талаарх мэдээлэл”, Хүнс, хөдөө аж ахуйн газраас “Хүнс, хөдөө аж ахуйн салбарын мэдээлэл”, аймгийн Цагдаагийн газрын Замын цагдаагийн тасгаас “Зам тээврийн ослоос урьдчилан сэргийлэх” чиглэлээр зохион байгуулсан арга хэмжээний талаар мэдээлэл хийв.

Аймгийн Засаг даргын орлогч Ч.Ганбат цаг үеийн нөхцөл байдалтай холбогдуулан дараах үүрэг даалгаврыг өгчээ. Үүнд

1.Үндэсний статистикийн хорооноос хүн ам, орон сууцны улсын завсрын тооллого явагдаж эхэлсэнтэй холбогдуулан ажилтан, алба хаагчдыг идэвхтэй хамруулан дэмжлэг үзүүлж ажиллахыг нийт байгууллагын удирдлагуудад,

2.Архив, албан хэрэг хөтлөлтийн тухай хуулийн 5 дугаар зүйлийн 5.2.3-т заасны дагуу Засгийн газрын 2025 оны 23 дугаар тогтоолоор төрийн байгууллагын архив, албан хэрэг хөтлөлт, ажлын зохион байгуулалтын улсын үзлэгийн бэлтгэл ажлыг ханган ажиллахыг нийт байгууллагын удирдлагуудад,

3.Гадаад харилцааны хамтын ажиллагааны хүрээнд олон улс оронтой санамж бичиг байгуулж, хамтарсан ажлын төлөвлөгөө гарган ажилласан байна. Үүний хэрэгжилт үр дүнг тооцсон тайланг танилцуулахыг АЗДТГ-ын Төрийн захиргааны удирдлагын хэлтэст, 

4.АЗДТГ-ын Төрийн захиргааны удирдлагын хэлтсээс тухайн сард зохион байгуулах ажлын төлөвлөгөөг бүх байгууллагаас авч нэгтгэж танилцуулан ажилладаг. Энэхүү төлөвлөгөөний хэрэгжүүлсэн ажил, арга хэмжээ бүрийн дараа тайлан гаргуулж, нэгтгэн дүгнэж ажиллахыг АЗДТГ-ын Төрийн захиргааны удирдлагын хэлтэст,

5. Шинэ спортын цогцолбор баригдаж байгаатай холбогдуулан “Дорнодын спортын явц цаашдын хандлага” хэлэлцүүлэг зохион байгуулахыг биеийн тамир спортын газрын даргад,

 6.Гарал үүсэл тодорхойгүй хүнсний бэлэн бүтээгдэхүүний хэрэглээнд хяналт тавих, хүнсний аюулгүй байдалд анхаарч ажиллахыг ШӨХТГ-ын Орон нутаг дахь улсын байцаагчид,

 7.Цахим аяны үр дүн ямар байгаа талаар мэдээлэхийг төрийн цахим үйлчилгээний хэлтсийн даргад,

 8.Хавирга боомтын 124км замын ажилд хяналт тавьж ажиллахыг АЗДТГ-ын Бүс, орон нутгийн хөрөнгө оруулалт, бодлого төлөвлөлтийн хэлтсийн даргад тус тус үүрэг болголоо.