Хэрлэн сумын 2-р багийн нутаг дэвсгэрт байрлах EF супермаркетын зүүн талд ШТС барихаар хашааг нь буулгаж эхэлсэн талаар мэдээлэл цахим орчинд түгсэн. Энэ асуудлаар аймгийн ИТХ-ын төлөөлөгч Б.Түшигтэй холбогдлоо.  

-Хоёрдугаар багийн нутагт цэцэрлэгт хүрээлэн байдлаар тохижуулсан ганц газар нь энэхүү ШТС барих гэж байгаа хэсэг юм байна. Энэ багаас сонгогдсон төлөөлөгчийн хувьд Та дээрх асуудалд ямар байр суурьтай байна вэ?

-Энэ тухай мэдмэгцээ тухайн газар эзэмшигч иргэнтэй утсаар холбогдож тодруулахад, одоогоор тэр хэсгийн мод тайрах, хашаа хатгах, барилгын ажил эхлүүлэх зэрэг ямар нэгэн үйл ажиллагаа хийгээгүй. Хэрэв ийм ажил эхлэх бол надад урьдчилан мэдэгдэнэ гэдгээ хэлсэн. Мөн тухайн иргэний өгсөн мэдээллээр уг газрыг 6–7 жилийн өмнө шатахуун түгээх станцын зориулалтаар авсан нь үнэн юм байна. Гэвч газар нь ногоон байгууламжтай байсан учраас тухайн үеийн Чойбалсан хотын удирдлагуудад байршлыг өөрчлөх, нөхөн олговроор өөр газар олгох саналаа удаа дараа тавьсан ч шийдэгдээгүй гэсэн. Үүний улмаас тэрбээр шүүхэд нэхэмжлэл гаргаж, хоёр шатны шүүхээр ялсан бөгөөд одоогийн хотын удирдлагуудад ч мөн нөхөн олговрын асуудлаар санал тавьж ажиллаж байгаа тухай мэдээлэл өгсөн. Тиймээс бид тухайн иргэнтэй ойлголцож, асуудлыг эв зүйтэй аргаар шийдвэрлэх чиглэлд хамтран ажиллахаар тохирсон. Уг газрын байршлын хувьд иргэдийн суурьшлын бүсэд, ЕБС-иас ердөө 200 метрийн зайд оршдог, манай багийн цөөн ногоон байгууламжийн нэг учраас энэ хэсэгт шатахуун түгээх станц барих нь архитектур, хот төлөвлөлтийн хувьд төдийлөн зөв шийдэл биш гэж бид үзэж байна. Иргэд, удирдлагууд энэ байр суурийг адилхан ойлгож байгаа.