Манай аймагт улаанбурхан өвчний тохиолдол бүртгэгдсэнтэй холбогдуулан Аймгийн онцгой комиссын 9 дүгээр хуралдаанаар Нийгмийн эрүүл мэндийн төвийн Тохиолдлын удирдлагын багийн явуулсан тандалт, судалгааны дүнг танилцууллаа. Аймгийн хэмжээнд хийсэн эрсдэлийн үнэлгээгээр улаанбурхан өвчний тархалтын эрсдэл өндөр түвшинд үнэлэгджээ.

Одоогоор 1500 тун нөөц вакцин байна. Нөхөн дархлаажуулалтыг шуурхай зохион байгуулж байгаа аж. 

Мөн Нийгмийн эрүүл мэндийн төвөөс цаашид олон нийтийг хамарсан үйл ажиллагааг халдвар хамгааллын дэглэм баримтлан зохион байгуулах, дархлаажуулалтад хамрагдаагүй бага насны хүүхдүүдийг нийтийг хамарсан арга хэмжээнд аль болох оролцуулахгүй байх тухай саналыг танилцуулж, 

Аймгийн онцгой комиссоос хүүхдийн баярын нэгдсэн арга хэмжээг халдвар хамгааллын дэглэм мөрдүүлэн зохион байгуулах, Төрийн болон төрийн өмчит байгууллага, аж ахуйн нэгжүүдийг дотор орчинд хүүхдийн баярын үйл ажиллагаа зохион байгуулахгүй байх тухай мэргэжлийн байгууллагуудын зөвлөмжийг хүргүүлэхээр шийдвэрлэснийг аймгийн Засаг даргын тамгын газраас мэдээлэв. 

Мөн дархлаажуулалтад хамрагдаагүй бага насны хүүхдүүдийг дотор орчинд цуглуулж, арга хэмжээ зохион байгуулах нь халдвар тархах нөхцөлийг бүрдүүлэхийг мэргэжлийн байгууллагууд анхааруулж байгаа тул байгууллага, аж ахуйн нэгжүүдийг зөвлөмжийг хэрэгжүүлж энхрий бяцхан үрсээ эрсдэлд оруулахгүй байхыг уриаллаа.