Дорнод аймгийн хэмжээнд сүүлийн хоёр жилийн хугацаанд улсын төсвийн хөрөнгө оруулалтаар хийж байгаа 12 ажлаас хоёр нь царцсан байдалтай байна.

Тодруулбал, Хэрлэн сумын 3-р багт 640 хүүхдийн ЕБС-ийн барилгын ажил 25 хувьтай, мөн тус багт барьж байгаа Музейн барилгыг энэ онд төсөвт суулгаагүйн улмаас зогссон гэж аймгийн ЗДТГ-ын Хөрөнгө оруулалт, хөгжлийн бодлогын хэлтсээс мэдээлэв. Бусад бүтээн байгуулалт хэвийн үргэлжилж байна.

Аймгийн зүүн захад барьж байгаа усан бассейн бүхий спорт цогцолбор, Цагаан-Овоо сумын 150 хүүхдийн ортой цэцэрлэгийн барилга тус бүр 90 хувь, Баян-Уул сумын 150 ортой дотуур байр, Хэрлэн сумын 11-р багт 150 хүүхдийн цэцэрлэгийн барилгууд 70 хувь, 1800 айлын орон сууцны хорооллын гадна дулааны шугамын ажил 30 хувь, цахилгаан хангамж, инеженерийн шугам сүлжээний ажил 60 хувь, “Шинэ хөгжил” цогцолбор сургуулийн 320 хүүхдийн суудалтай өргөтгөлийн барилга 15 хувь,12-р сургуулийн бага сургуулийн барилга 30 хувь, Сэргэлэн сумын сургуулийн өргөтгөл 30 хувийн гүйцэтгэлтэй байгаа юм.

Аймгийн төвийн ус хангамжийн шугам сүлжээний ажил буюу шугам шинээр солих болон доторлох ажил 30 гаруй хувьтай үргэлжилж байна.