Азийн Ойн хамтын ажиллагааны байгууллага, Монгол Улсын Засгийн газрын хэрэгжүүлэгч агентлаг Ойн газартай хамтран "Монгол Улсад “Тэрбум мод” үндэсний хөдөлгөөнийг дэмжих зорилгоор өндөр хүчин чадалтай мод үржүүлгийн газар байгуулах, чадавхыг бэхжүүлэх замаар ойг нөхөн сэргээх нь" төслийн хүрээнд Дорнод аймгийн Баян-Уул суманд мод үржүүлгийн газрыг байгуулж байна.

 Дорнод аймагт мод үржүүлгийн үйл ажиллагаа явуулдаг иргэн, нөхөрлөл, ААН байгууллага, ойн нөхөрлөлийг дэмжиж тарьц суулгацыг худалдаж авч Баян-Уул сумд орших Эрээн давааны доройтсон ойг нөхөн сэргээхэд 100 га талбайд 200 мянган ширхэг нарсыг суулгах юм. Мөн усжуулалтын систем бүхий 4х6 хэмжээтэй 30ширхэг хүлэмжийг иргэдэд 6х20 хэмжээтэй 8 хүлэмжийг Баян-Уул суман дахь сум дундын ойн ангид ашиглуулах боломж бүрджээ.  

Өнөөдрийн байдлаар модны тарьц суулгац тарих, арчлах, хортон шавж, түймэр унтраахад зориулж 1.2 тэрбум төгрөгийн үнэ бүхий техник, тоног төхөөрөмжийг Баян-Уул суман дахь сум дундын ойн ангид нийлүүлээд байгаа юм.

Баян-Уул суман дахь Сум дундын Ойн ангийн хүчин чадлыг нэмэгдүүлснээр "Тэрбум мод" үндэсний хөдөлгөөнийг хэрэгжүүлэхэд шаардлагатай Дорнод аймгийн 40 сая мод тарих ажилд тарьц, суулгацыг нийлүүлэх нөөцийг бүрдүүлэх боломжтой гэж төслийн зохицуулагч Т.Батсүх хэлж байна.