Олон улсын хөдөлмөрийн байгууллагаас жил бүрийн дөрөвдүгээр сарын 28-ныг Ажлын байран дахь хөдөлмөрийн аюулгүй байдал, эрүүл ахуйн дэлхийн өдөр болгохоор 2003 онд шийдвэрлэсэн. Манай улс 2012 оноос уг өдрийг тэмдэглэдэг болсон юм. Хөдөлмөрийн аюулгүй байдал, эрүүл ахуйн хууль тогтоомж, стандартыг хэрэгжүүлэх, үйлдвэрлэлийн осол, хурц хордлогоос урьдчилан сэргийлэх ажлыг жил бүрийн дөрөвдүгээр сард улсын хэмжээнд шинэлэг арга хэлбэрээр зохион байгуулж хэвшсэн.

Дэлхий дахинд нийт ажиллах хүчний 15 хувь нь 15-24 насны залуучууд. Энэ насны залуучуудыг 25-аас дээш насны ажиллах хүчтэй харьцуулахад үйлдвэрлэлийн осолд өртөх эрсдэл нь 40 хувиар илүү байна. 

Хөдөлмөр, нийгмийн хамгааллын салбарт төрийн хяналтыг хэрэгжүүлэх чиг үүрэг бүхий, хөдөлмөр, хөдөлмөрийн эрүүл ахуй, нийгмийн хамгааллын хяналтын улсын 162 байцаагч харьяа агентлаг, аймаг, нийслэл, дүүрэгт томилогдон ажиллаж байна. Төрийн хяналт шалгалтын тухай хуулийн хүрээнд Засгийн газрын 2022 оны 479 дүгээр тогтоолоор баталсан Хяналт шалгалт хийх нийтлэг журмын гуравдугаар зүйлд заасны дагуу 2023 онд бид гурван шалгуур үзүүлэлтээр 26 196 объектыг эрсдэлийн үнэлгээнд хамруулж, мэдээллийн сан бүрдүүлжээ.

Ажлын байрны эрүүл ахуйн шаардлагыг хангаагүйгээс үйлдвэрлэлийн аюултай орчин үүсэж, хүний биеийн болон сэтгэцийн эрүүл мэндэд нөлөөлж, хөдөлмөрлөх чадварыг бууруулах, мэргэжлээс шалтгаалсан өвчин бий болгох зэрэг хохиролтой. Тиймээс үүнээс урьдчилан сэргийлж чадвал иргэн, ажилтны амь нас, эрүүл мэндийг хамгаалах, цаашлаад гэр бүлийн амьдралын чанар, аж ахуйн нэгж, байгууллагын ашиг орлогод нөлөөлөхүйц онцгой ач холбогдолтой.