Энэ “бор ёотон” шиг байшин доторх халууны хэм өнөөдөр огцом өсөж байна. МАН-ын Удирдах зөвлөлөөс Н.Энхбаатар тэргүүтэй хоёр хүн аймгийн МАН-ын хороон дээр ажиллаж байгаа. Намын хорооны тэргүүлэгчдийн хурлыг өнөөдөр 16.00 цагт, Намын хорооны гишүүдийн хурлыг 17.00 цагт хийхээр зарласан ч одоо болтол хурал нь хойшилсоор, байшингаа тойроод бусад нь хүлээсээр сууна.

Учир нь, МАН-ын Удирдах зөвлөлөөс М.Энхтөрийг аймгийн Засаг дарга, Г.Цолмонг ИТХ-ын дарга болго гэсэн чиглэл өгчээ. УИХ-ын сонгуулиар зүүн бүсэд МАН-аас сонгогдсон 6 гишүүний /М.Бадамсүрэнгээс бусад нь/ тав нь үүнийг дэмжсэн байна. Экс Засаг дарга маань хадны завсар хавчуулагдсан халиуны зулзага хөөрхий гэх үү, хүртэх ёстойгоо л хүртэж дээ гэх үү. Юу ч гэмээр юм.

Ямартаа ч МАН-ынхаа Удирдах зөвлөлийн шийдвэрийг үг дуугүй дагах гэхээр төдийгөөс өдий хүртэл хамт явж ирсэн, журмын нөхөр Ш.Ёлыгоо гурав дахь удаагаа мурьсан болчих гээд, эрийн хуйх шиг зориглоод Ш.Ёлыгоо аймгийн Засаг даргад зүтгүүлэх гэхээр өөрөө төвд очоод УЗ-ийн шийдвэрийг зөрчсөн гэдэг ялд унаж, ямар ч дэмжлэггүй болж хатавч бараадчих гээд хэцүүхэн байгаа дуулдана.

Гэхдээ “түгжилдэж” сураагүй биш.

Намын хороон дээрээ Ш.Ёлыгоо зүтгүүлээд барсангүй гэдэг жүжгийг тавьчихаж дөнгөх л болов уу? Түүнд нөхөд нь өнөөдрийг хүртэл итгэж энэ өндөрт хүргэсэн ч тэрээр хэзээ ч нөхөддөө итгэж байгаагүй билээ.

М.Энхтөрийн хувьд төвөөс том дэмжлэгтэй. Гэхдээ Ш.Ёлын хувьд МАН-ын УЗ-ийн шийдвэрийг сөрнө гэсэн байр суурьтай байгаа ч болгоомжлол төрж буй нь дамжиггүй. Хэрвээ өнөө шөнийн Намын хорооны хурал дээр дэмжлэг авч чадахгүй бол маргааш ИТХ-ын хуралдаанд орохдоо Ардчилсан намтай тохироод, М.Энхтөр, Б.Энх-Эрдэнэ, Г.Цолмон гурваас бусдынх нь саналыг хамчих юм бол Засаг даргын суудлаа авчих боломжийг тооцоолж буй биз.

Харин Засаг даргаар сонгогдоод очиход нь Ерөнхий сайд Л.Оюун-Эрдэнэ батламжлахгүй байх вий гэсэн айдас түүнд байхыг үгүйсгэхгүй. Хамгийн гол нь одоо түүний эр зоригоос цаашдын үйл явдал хэрхэн өрнөх нь зурагдана. Эр хүн зоригтой бол... гэдэг сээн.

Нэмж хэлэхэд, Г.Цолмон гэх шинэ хүн гэнэт гарч ирсэн учрыг цухас тайлбарлаад өгчихье өө. Олон нийт бодит мэдээлэлтэй байх нь чухал биз ээ гэж бодно. 2028 оны сонгуульд Зүүн бүсийг Х.Нямбаатар ахалж орж ирэх төлөвлөгөөтэй бөгөөд өөрийн хүн болох Г.Цолмонг Дорнодын Засаг даргаар тавьж чадвал нэг хөлөөрөө бат гишгэлээ л гэсэн үг юм билээ шүү.